إبراهيم الدريس

يالجواد أهلك عجب ما جولك!

ابغربه رحت او شيعتك يبجولك

بالسطح ونِّ الحَمَام

وين أهلك و العَمَام ؟!

ياللي ما عاش الفرح لحظه ابدليلك

يتَّم النسمات يالغالي رحيلك

متت محَّد بالعَذِب برَّد غليلك

عالسطح ظليت ما واحد يشيلك

بالسطح محَّد إجاك او شالك

وين أعمامك غِدت واَخوالك؟!

وَحَّدك تلكه الحِمَام!

 وين أهلك والعَمَام؟!

لا تظن جمرةْ غيابك بينه تبرَد

او على امصابك من دِمَه يبجي مُحمَّد

امصيبتك لِجْمَت ضِلِعْنه ألله يشهَد

او حتى مدمعنه اليِهِل لابس لك أسوَد

ابمجلسك يبن الرضا تلكانه ..

كل سنه والزهره تبجي اوْيانه ..

بالشمِس يبني تنام!

 وين أهلك والعَمَام؟!

ابعِز شبابك أَخْذِتك هاي المنيه

غيبتك فطّرت جبْد الكاظميه

الغاضريه اعليك تبجي الغاضريه

او شال رايةْ حسره تلِّ الزينبيه

والألم واللوعه كلها ابمشهد

فرقد اينوح ابهظيمه الفرقد

بالدمِع صار الكلام

 وين أهلك والعَمَام؟!

فطّر الهاي السِّمه يالغالي سَمَّك

والشمِس صِهْرَت ثلثةَ أيام جسمك

إلطيور اتظلِّل اعليك او تِكلْمَك

ليش محَّد من هَلَك يالوالي يمك؟!

جاوَبِتْها اِبْعاد عني اهوايه

او هيج موتي بيْه عندي غايه

غايتي الطف والسلام

 وين أهلك و العَمَام؟!

صح متت بالغربه وأحوالك رَهيبه

لجن جثتك سالمه او ما هي سليبه

إنته صح مطروح بالحر او لهيبه

لجن من دمك لِحِيْتك مو خضيبه

امن القفا لا مَنْكِطَع لك نحرك

او لا حوافر هشِّمت لك صدرك

بالجِسِم ماكو سِهام

 وين أهلك والعَمَام؟!

ابغربه ألله كاتب العمرك نهايه

بس أُخُوْتك عالأرض ما هُم ضَحَايه

عيلتك ما شافت اهوال او رَزَايه

او عالهزل ما راحت اِبْناتك سِبايه

بعد موتك عيلتك مهيوبه

اِخْيَمْها ما محروكه لا مضروبه

ما إلك حركوا خِيام

 وين أهلك والعَمَام؟!